Undi fusti,
Ca ti circai cchi lumi da lumera
E ppi ogni cantunera:
Varda comi sugnu vagnato di sudura
Ppi ti circari intra li fraschi nta sta notti scura
E cchi malanova ti pigghiau bedda signora;
Ogni tantu veniva nu sciatu d’aria nta scuvazza
Ca mi ntisavanu puri i quattru pila da tignazza,
Comi li spini di li ficarazza
M’assettu nto bizzolo,oh chi stanchizza
Aiu intra l’ossa di li scianchi e nta li brazza
E sugnu cchiù virdi,di la raggia, peiu i na cucuzza.
Nun sintivi? Micuzza,Micuzza undi si ncugnata,
Si ti pigghiu..e ccu ti sarva di na santa vastunata?
Nesci fora brutta nniricata.
Peppi oh Peppi,ppi quanto è veru u sali da salera
Eu nun sapiva d’esseri sunnamola a sta manera
Chi nesciu fora senza suttana comi sugnu ora,
E a notti quannu è comi u carvuni nira,nira
E quannu c’esti a luna para para
I cca e i nna,iendu e vinendu,povera a mmia a mara.
Ma Peppi chissu ca ti cuntu
U seppi sulu ora ca nun passau mancu nu mumento
Chi mu rissi nu frati du cunventu,
Ccu na vuci nica,nica:
Tu si sunnammola e teni sutta nu vrasceri i focu
Ed eu ppi nun farti vrusciari u stutu a pocu a pocu.
E cchi sugnu vrocculu,carcioffulu arrustutu..
Tu ppi ora pigghia pa casa,mentri eu ,chi nun sugnu santu
Vaiu e a vucca asciucu o frati du cunventu;
Peppi oh Peppi
E si m’appiccia u focu anchi stasira?
Ppi quantu su cornuto,t’appicciu eu cu stu lumi di lumera
|